Ndryshe nga praktika e zakonshme, kur energjia blihet kryesisht për periudha javore ose afatshkurtra, kësaj here KESH ka zgjedhur të sigurojë furnizimin për të gjithë tremujorin e tretë të vitit. Në total janë kontraktuar 331,200 MWh, me një çmim mesatar prej 125.47 euro/MWh dhe me një vlerë prej rreth 41.6 milionë euro, pa TVSH.
Korporata Elektroenergjetike Shqiptare (KESH) ka realizuar blerjen e parë të energjisë elektrike për vitin 2026, duke kontraktuar një sasi prej 331,200 MWh për periudhën 1 korrik – 30 shtator 2026. Procedura përfaqëson jo vetëm importin e parë të këtij viti, por edhe një nga kontraktimet më të mëdha të viteve të fundit, si për nga volumi, ashtu edhe për nga kohëzgjatja.
Ndryshe nga praktika e zakonshme e KESH-it, ku energjia blihet kryesisht për periudha javore ose afatshkurtra, kësaj here korporata ka zgjedhur të sigurojë furnizimin për të gjithë tremujorin e tretë të vitit. Në total janë kontraktuar 331,200 MWh, me një çmim mesatar prej 125.47 euro/MWh dhe me një vlerë prej rreth 41.6 milionë euro, pa TVSH.
LEXO EDHE:
Kosova rrit prodhimin e thëngjillit, por mbetet e varur nga importi i energjisë elektrike
Kjo blerje vjen pas një periudhe të favorshme hidrike gjatë muajve të parë të vitit. Të dhënat financiare tregojnë se, në periudhën janar–prill, u shitën 456,945 MWh me një çmim mesatar prej 60.51 euro/MWh, duke gjeneruar të ardhura prej rreth 33.15 milionë euro, me TVSH, ka raportuar Scan TV.
Megjithatë, hyrja në sezonin veror zakonisht ndryshon balancën energjetike të vendit. Rënia e prurjeve në kaskadën e Drinit, e kombinuar me rritjen e konsumit gjatë muajve të nxehtë, shton nevojën për sigurimin e energjisë përmes importit.
Edhe gjatë vitit 2025, korporata u detyrua të importonte energji përgjatë gjithë vitit. Sipas të dhënave të Entit Rregullator të Energjisë, vitin e kaluar fatura për blerjen e energjisë arriti në 272.2 milionë euro, me TVSH.
