Çmimi maksimal i lejuar i naftës në Kosovë është rritur për 29 centë për litër, ose rreth 20.9 për qind, brenda 23 ditësh.
Sipas të dhënave të publikuara nga Ministria e Industrisë, Ndërmarrësisë, Tregtisë dhe Inovacionit, më 1 korrik 2026 çmimi maksimal i naftës ishte 1.39 euro për litër. Më 23 korrik, ky çmim ka arritur në 1.68 euro për litër.
Kjo nënkupton se një litër naftë kushton 29 centë më shumë krahasuar me fillimin e muajit.
Si ndryshoi çmimi i naftës gjatë korrikut?
Vetëm gjatë javës së fundit, çmimi maksimal i naftës ka ndryshuar pothuajse çdo ditë:
– Më 17 korrik: 1.60 euro për litër;
– Më 18 korrik: 1.63 euro për litër;
– Më 19 dhe 20 korrik: 1.64 euro për litër;
– Më 21 korrik: 1.66 euro për litër;
– Më 22 korrik: 1.67 euro për litër;
– Më 23 korrik: 1.68 euro për litër.
Nga 17 deri më 23 korrik, çmimi maksimal i naftës është rritur për tetë centë për litër.
Shtrenjtohet edhe benzina, bie çmimi i gazit
Krahasuar me 1 korrikun, është shtrenjtuar edhe benzina. Çmimi maksimal i saj është rritur nga 1.35 në 1.49 euro për litër, ose për 14 centë.
Në të njëjtën periudhë, çmimi maksimal i gazit ka rënë nga 0.68 në 0.60 euro për litër, përkatësisht për tetë centë.
Çmimet e publikuara nga MINT-i përfaqësojnë kufirin maksimal të lejuar për shitjen e derivateve. Kjo do të thotë se pikat e shitjes mund t’i shesin derivatet me çmime më të ulëta, por jo mbi kufirin e përcaktuar.
Lexo më shumë:Nafta shkon në 1.64 euro për litër, MINTI publikon çmimet e reja të derivateve
