Agjencia e Ushqimit dhe Veterinarisë (AUV) në Kosovë nuk ka reaguar ende për lajmet e raportuara për disa produkte me përmbajtje kancerogjene që po tregtohen në Kosovë e rajon.
Fjala është për disa akullore të brendeve Twix, Bounty, Snickers dhe Mars, për të cilat autoritetet ushqimore të Bashkimit Evropian dhanë alarmin ditëve të fundit për përmbajtje kancerogjene.
Pas këtij alarmi, Shqipëria dje ka hequr nga përdorimi dhe ka asgjësuar 6 llojë të akulloreve që përmbanin këtë lloj substance të palejuar.
“Në vijim të njoftimit të ardhur nga sistemi Informimit të Shpejtë për Ushqim dhe Ushqim për Kafshë i BE për përmbajtje oksid etileni, substance e paautorizuar ne stabilizues lygom të përdorur për prodhimin e akullores, AKU në bashkëpunim me OBU-të të cilët kanë importuar, shpërndarë dhe tregtuar produktet në fjalë, mbi bazën e sistemit të gjurmueshmërisë, inspektimeve fizike tek subjektet importuese dhe tregtuese, është bërë e mundur tërheqja nga tregu e këtyre produkteve, sipas specifikimeve teknike (Nr. Loti, datë skadence dhe sasi) të evidentuara nga sistemi RASFF. Llojet e akulloreve të evidentuara me problematikë dhe të bllokuara nga AKU, duke filluar që nga marrja e njoftimit datë 31.07.2021 janë: BTY XTRA Ice Bar; BTY Ice Bar; TwIX Ice Bar; TWIX XTRA; SNK XTRA Ice Bar; SNK Ice Bar, për të cilat do të vijohet me procesin e asgjësimit” – thuhej në njoftimin e Autoritetit Kombëtar të Ushqimit atje.
