Mbi 1.2 milionë euro më shumë se që ishin planifikuar ka shpenzuar Qeveria Haradinaj nga Fondi i Rezervës gjatë këtij viti. Kjo Qeveri shteri Fondin e Rezervës prej 4.8 milionë eurosh vetëm për 9 muaj.
Megjithatë, kjo shumë nuk i është mjaftuar Qeverisë në largim. Të martën në këtë fond është derdhur edhe një shumë nga mjetet e kursyera buxhetore. Shuma e shpenzimeve arriti në mbi 6 milionë euro.
Mënyra e shpenzime të këtij fondi, sipas përfaqësuesve të shoqërisë civile, është në kundërshtim me Ligjin për financa publike dhe aktet nënligjore, shkruan sot Koha Ditore. Sipas tyre, shumica e aktiviteteve të përkrahura nuk hyn në kuadër të rasteve urgjente, por hyn në kuadër të keqplanifikimit, keqpërdorimit dhe keqadministrimit të parasë publike.
Këto aktivitete do të mund të planifikoheshin në linjat e rregullta buxhetore dhe të mos përdoreshin fondet e rezervës.
